DE KOMMENDAR fir Mai/Juni 2005
Schröder hat Angschd um sei Lade und deshalb gebts Neiwahle !
Mei liewa Herr
Gesangvaein, hann na dass widda geheert! Im Sebdemba solla ma widda wähle gehn,
ähn Johr bevors eichentlich sinn sollt. Awewa gudd, so schlimm iss dass jo a
nidd. Kinne ma denno do in Berlin und sunschd wo mo nommo zeie wo de Hamma
hängt. Das kinne ma jo sunschd nitt. Sonschd intresiere die Berufsbolittika
sich jo garnidd fir uns. Iss nur komisch, dass de Schröder in Berlin selbschd
gesaad hat, dass er Neiwahle will. Der ist jo numo an da Regierung. Isch glaab
die hann ke Luschd me. Imma denne Ärja mit denne annare von da CDU. De
Bundesrat mennt ach imma er mist ach noch was sahn unn quertreibe. Do kann ma
schun mo ke Luschd me hann. Awwa die falle jo weich. Nit dass die nit ihr Geld
grien solle, das nit, awwa was die so fir Pengsione grien, mei liewa Mann. Do
muss e alt Fra ganz scheen vill fir strigge gehn.
Awwa vieleicht gebts jo do noch e ganz annara Grund. De Schröder wees selwa,
dass er die do Wahl nit gewinne kann, noch e Hochwasser gebts nit. Awwa er
muss gugge, dass er sei Leid sesamme halt. De Oskar iss jo schon abgesprung und
geht vieleicht bei die Wahlalternative, mo gugge. Annare hann ach schon gemennt,
dass es ihne bei da SPD nimme so gefallt. Do hat der Schröder und der
Müntefehring gemennt, dass se jetzt e Wahlkampf anzettle misse um die Mitglieda
widda stärga an die Pardei se binne. Gemeinsam gehe Merkel und Stoiber unn so.
Beim Ottmar Schreiner scheint das jo zu klabbe. Vieleicht iwwaled er sich das
awwa
ach nommo - wees ma nidd. Domit wollde se nadierlich auch die Linkspardeie
"Wahlalternative" und "PDS" ins schwitze bringe, weil die
jetzt kenn richtich Zeit me hann um sich zusamme zu raufe. Wenn es awwa doch
noch glabbt und die Wahlalternative und die PDS mit em Oskar antrete kinne, dann
kann sich die SPD awwa uff was gefasst mache. Vieleicht iss dass jo ach mo ganz
gudd so!
Allee dann
MANFRED
KLASEN
------------------------------------------------------
DE KOMMENDAR
fir Herbschd 2004
Im Saarland unn Saarbrigge bleibt alles beim alde - odda doch nit?
Bei da Regierung im Saarland bleibt alles wies war. Die Landachswahl iss
genau so ausgang wie ma das sich hat denge kinne. Die CDU hat gewunn unn mir
hann ach in Zukunft de schwatze Peter. Nur bei de Minischda wääs mas noch nit
so genau, awwa ma hert, dass sich do was dun kinnt! Wer wääs, wenn de Hecken
in Saarbrigge nitt Owwabirjameischda wird, ka jo sinn, dann muss de Müller-Pit
dem was bessares genn, also e Minischdaposte. Awwa wie gesaht - nix genaues
wääs ma.
Awwa jetzt mo nommo no Saabrigge. Do wirds am Sunndach (19.9.) noch rischdisch
spannend. De Hecken (CDU) und die Frau Britz (SPD) lieje jo zimlich dicht
beisamme. Die Griene hann sich für die Frau Britz unn die FDP hat sich für de
Hecken ausgesproch. Iss jo ach ke wunna. Die FDP will midd da CDU koaliere, dann
muss se jo ach denne von da CDU unnastitze unn die Griene wolle odda dirfe nidd
mit da CDU koaliere also unnastitze se die Frau Britz (sCharlotte). Ganz so ähnfach iss es nadirlich nid, do iss
bestimmt hinna de Kulisse ganz scheen gepogat und
gemach genn, das kinne na awwa klaawe. Von weje de bessare Kandidat unn die
gleiche Ziele unn so Zeich. Do wird geguggt wer demnägschd noch e freia Poschde gridd und wer noch was fir sei Leid ("Wählakliendel")
dun kann. Es iss nadirlich "reina Zufall" dass die Griene die
Stadtaudobahn in de Tunnel stecke wolle (Lärmschutz) unn genau gejeiwwa am
Staade e Hochbursch vun de Griene iss. Alles Zufall - bin mo gespannt was die
FDP sich had infalle laase. Vieleicht e koschdenloses Paakrecht für die Ärzde
und Rechtsanwäld am Beethoweplatz, für die nägschde hunnad Johr. Do spield
dann ach ga kä Roll was das koschd - das iss dann halt so. Do denewe gebts dann
zum Beispiel e Juchendclub, wie in Gerschweila de "Future Club", demm
fehle iwwas Johr 2000 Euro unn wenn a die nid hat muss a zumache. Unn jetz wird
widda driwwa disgudiert ob in Aldekessel die nei Sporthall gebaut genn soll odda
doch nitt, obwohl dass fir de ganze Saarbrigga Weste ganz wischdisch wär. Do
misse na mohl die Kadidade froe was se dozu saan. Awwa am Enn kummts halt doch
do druff ahn wemm ma vatraue kann unn von wemm ma als Saarbigga odda
Saabriggarin vaträt genn will. Ich will jo nix saan, awwa ich kann mir nidd
vorstelle, dass die Leid jemand wähle den se nidd rischdisch kenne unn der se
nidd wirklich vasteht. Awwa mir wirre siehn. Machen dass na zur Wahl gehn, es
iss jo ach eia Owwabirjameischda odda eia Owwabirjameischdarin. Also mir siehn
uns!
Allee dann
MANFRED
KLASEN
------------------------------------------------------
DE
KOMMENDAR
fir
Summa 2004
DIE "BRAUNE" IM BEZIRKSRAT - ich glaabs nidd!
Mei liewa Mann, ich kann eich
sahn, als ich no da Kommunalwahl die Ergebnisse für unser Egge do im Saarbrigga
Weste gesieh hann, iss mir ganz annaschd genn. Hann doch die NPD-la mit
iwwa 8 % zwei Leid in de Bezirksrat ninn gridd. Do froht ma sich doch was das
soll unn wie das hat kumme kinne .
Johrelang hann die annere Pardeie so gemach als wann sie unna sich wäre und die
Braune nix se schwätze hätte. Iss annaschd kumm und die misse sich mo frohe ob
se do nidd auch e bissje dran Schuld sinn.
Wenns de Leid schlecht geht, unn es geht imma mehr Leid schlecht, dann muss es
änna von de Poliddigga Schuld sinn. Stimmt ja ach, wenn ma de Leid imma mehr
an Sozialleischdungen kirzt unn es dehemm nur noch Nudle gebt, iss de Knaatsch
do. Deshalb muss ma nidd die Braune wähle, die hann schon genuch Ungligg iwwa
uns gebracht. Awwa die Leid vagesse halt schnell. Die annere Politigga hätte
das awwa wisse kinne, nur gemacht hann se halt nix.
Wenn änna dumm Zeich iwwa Auslänna geschwätzt hat, hann se oft ach nidd de
Mund uff gridd. Im Gejedäl, oft hann se denne Dummschwätza auch noch Recht
genn. So kann ma nadirlich nidd gehe die Braune vorgehn. Unn die Leid die die
gewählt hann misse sich mo frohe was se do gemacht hann. Wer klaawe ihr dann
kääm als erschda in die Awedslacha, wenn se welche baue wirde? Do kinne na
awwa drei mo roode! Die Leid mit de digge Geldbeidel jedenfalls nidd.
Jetzt hugge die zwei Grindkepp im Bezirksrat unn dürfe ihr Gift vaspritze. Die
annere Parteie hann jetzt, woos sespät iss, gesaad dass se mit denne nix
seduun hann wolle. Jo - guggen dass die nidd all zu vill mache kinne unn guggen dass
die beim nägsche mol sich de Bezirksrat von ause angugge kinne. Ma muss sich
jo schäme unn dass iss noch lang nidd das schlimmschde do debei.
Allee dann:
MANFRED KLASEN